पुस १४, २०७६ बाँके ः चितुवाको आक्रमणमा परी घाइते भएका दीपबहादुर श्रीसलाई खजुरा गाउँपालिकाले राहत स्वरुप रकम प्रदान गरेको छ। खजुरा गाउँपालिका ३ धौलागिरीस्थित किरणनालामा आएको बाघले सर्वसाधारणलाई आक्रमण गर्न थालेपछि अरुको ज्यान जोगाउन गएका श्रीसलाई चितुवाले आक्रमण गरी घाइते बनाएको थियो। घाइते श्रीसको नेपालगन्जस्थित मेडिकल कलेजमा उपचार भए पनि पूर्णरुपमा स्वस्थ्य नभएपछि थप उपचारमा सहयोग पुर्याउने उद्देश्यले एक लाख रुपैयाँ प्रदान गरिएको गाउँपालिका अध्यक्ष किस्मतकुमार कक्षपतिले जानकारी दिए। रकम अभावमा उपचारमा समस्या आएको जानकारीमा आएपछि उपचारका लागि रकम प्रदान गरिएको उनले बताए। गाउँपालिकाका पदाधिकारी र राजनीतिक दलका नेताहरू श्रीसको घरमै पुगेर राहत रकम प्रदान गरेको गाउँपालिका उपाध्यक्ष एकमाया विकले बताइन्। घाँटी र छातीमा चितुवाको नङ्ग्राले गहिरो चोट पुर्याउनुका साथै दायाँ खुट्टाको दुई ठाउँमा गम्भीर चोट लागेको छ। उनको दायाँ खुट्टामा रड राखेर अप्रेशन गरिएको छ। उनलाई घाउ निको हुन केही समय लाग्ने बताइएको छ। उनी अहिले चिकित्सकको सल्लाहमा घरमै आराम गरिरहेका छन्।
