दिवाकर पोख्रेल
देउखुरी, साउन २९ गते : नेपाल सरकारका शहरी विकास मन्त्री मेटमणी चौधरीले आफ्नो निर्वाचन क्षेत्र दाङ देउखुरीमा ठूला र महत्वकांक्षी योजना सुनाउनुभएको छ ।
पोडवे, करिडोर, केवलकार, सुरुङ मार्ग र नयाँ विमानस्थल जस्ता योजना सुनाउँदा देउखुरीबासी खुसीले गदगद भएका छन् । विभिन्न संघसंस्थाहरुले आयोजना गरेका कार्यक्रममा मन्त्री चौधरीले काम गर्नको लागि मन्त्रीहरुमा दृष्णिकोण आवश्यक रहेको बताउँदै आफ्नो कार्यकालमा दाङ देउखुरी क्षेत्रमा नयाँ र महत्वकांक्षी योजना लागु गर्ने प्रतिबद्धता ब्यक्त गर्नुभएको भयो ।
दलित सचेतना अभियानको नवनिर्मीत भवनको समुद्घाटन गर्दै मन्त्री चौधरीले नेपालमै पहिलो पटक अभ्यास गर्नेगरी पाड्वेको परिकल्पना सहितको योजना सुनाउनु भएको हो । तुलसीपुर, घोराही, लमही, भालुवाङ क्षेत्रमा पोडवे संचालनको लागि बिस्तृत योजना बनाउन पहल भइरहेको उहाँको भनाइ छ । यस्तै मन्त्री चौधरीले लमही–घोराही सडकमा सुरुङ मार्ग, देउखुरी स्वर्गद्धारीको लागि केवलकार र देउखुरी क्षेत्रका राप्ती गाउँपालिका क्षेत्रमा नयाँ विमान स्थलको दिर्घकालिन योजना बनाएर काम गर्ने बताउनभुयो ।
मन्त्री चौधरीले भन्नुभयो, दाङ देउखुरीमा नमूना काम गर्ने मेरो योजना छ, त्यसको लागि नयाँ प्राविधिका सडक, विभिन्न ठूला योजनाको काम शुरुगर्ने गरी अध्यन भइरहेको छ । अहिले सम्म आफ्नो पहलमा भएका कामको फेरीस्ता सुनाउँदै मन्त्री चौधरीले देउखुरी क्षेत्रमा अबको केहीबर्ष कुनैपनि सडक कच्ची नहुने र सबै कालोपत्रे हुने दावी समेत गर्नुभयो ।
यस्तै कोइलाबास क्षेत्रमा ल्याण्डपुलिङ,गढवा क्षेत्रमा सिटीहल राप्ती गाउँपालिकाका सडक कालोपत्रे कामको योजना यसै वर्षबाट शुरुहुने जानकारी दिनुभयो । यस्तै तुलसीपुरमा रहेको बिमानस्थलमा ७२ सिटे विमान बस्नेगरी स्तरबृद्धिको काम गर्न पनि बजेट विनियोजन गर्ने बताउनुभयो ।
संवैधानिक सर्वोच्चता कायम राख्न गठबन्धन
शहरी विकास मन्त्री मेटमणी चौधरीले संवैधानिक सवोच्चताको लागि गठबन्धन कायम राखिने बताउनुभयो । दुइ पटक सम्म प्रतिनिधिसभा विघटन गरेको स्मरण गर्दै मन्त्री चौधरीले संसद विघटन जस्तो कार्यलाई आफुहरुले सामान्य रुपमा नलिएको बताउनुभयो । उहाँले भन्नुभयो, संसद बिघटन सामान्य थिएन, एमाले बाहेक दलहरु एक भएर गठबन्धन कायम राखेका छौ, यो पछि सम्म पनि हुन्छ, यो समावेशी लोकतान्त्रिक गणतन्त्र बचाइराख्न चालिएको कदम पनि हो ।
मन्त्री चौधरीले लमही नगरविकास समितिले निर्माण गर्न थालेको बहुउद्देश्यि सभाहलको शिलन्यास गर्नुभएको छ । एकहजार मानिस अट्ने उक्त भवन पूरा गर्न जम्मा ५३ करोडको लागत अनुमान गरिएको छ ।
भवन शिलन्यास कार्यक्रममा शहरी विकास मन्त्रालयका सचिव डा. रमेशप्रसाद सिंहले सभाहल सुविधा सम्पन्न बनाउन आवश्यक रहेको बताउनुभयो । जग्गा प्रशस्त रहेको र उपयुक्त ठाउँमा रहेकाले उक्त भवनको योजना आफुले स्विकृत गरेर जतिसक्दो छिटो निर्माण सम्पन्न गर्ने गरी काम थालिने जानकारी दिनुभयो ।।
