चिकित्सा शिक्षाका विद्यार्थीद्वारा बोर्ड परीक्षा बहिस्कार, जलाए प्रवेशपत्र

0
221

मंसिर १८, २०७६ चितवन ः चिकित्सा शिक्षा अध्ययनरत विद्यार्थीले बुधबारबाट सुरु भएको बोर्ड परीक्षा बहिस्कार गरेका छन्। एमबिबिएस, बिडिएस, बिएसी नर्सिङ, बिएनएस, बि फार्मेसी, बिपिएच, बिएफएलटी र बिएमआइटीका देशैभरका विद्यार्थीले बोर्ड परीक्षा बहिस्कार गरेका हुन्। बुधबारबाट हुने भनिएको एमबिबिएसबाहेक अन्य सातवटा संकायको पहिलो वर्षको परिक्षामा विद्यार्थी सहभागि भएनन्। विद्यार्थीले प्रवेश कार्ड जलाएर बहिस्कार गरेको चितवन मेडिकल कलेजमा नर्सिङ दोस्रो वर्षमा अध्ययनरत विद्यार्थी कला अधिकारीले बताइन्। एमबिबिएस पहिलो वर्षको परीक्षा भोलिबाट हुने भए पनि बुधबार उनीहरूले प्रवेश पत्र जलाएर बहिस्कार गरेका छन्। चितवन मेडिकल कलेजसहित युनिभर्सल मेडिकल कलेज, नेशनल मेडिकल र जानकी मेडिकल कलेजका विद्यार्थीले परीक्षा बहिस्कार गरेको चिकित्सा शिक्षा संघर्ष समितिले जनाएको छ। चितवन मेडिकल कलेजका विद्यार्थीले प्रवेश पत्र जलाउनुका साथै पेन डाउन गरेर परीक्षा बहिस्कार गरेका हुन्। उता, युनिभर्सल मेडिकल कलेजका विद्यार्थीले पनि पेन डाउन र मानव सांलो बनाएका थिए। मेडिकल कलेजले विद्यार्थीबाट गैरकानुनी रूपमा लिएको बढी शुल्क फिर्ता गर्नुपर्ने माग गर्दै देशैभरका मेडिकल शिक्षा अध्ययनरत विद्यार्थी विगत तीन महिनाभन्दा लामो समयदेखि आन्दोलनमा रहेका छन्। पछिल्लो समय सरकार र मेडिकल कलेजबीच भएको सहमतिप्रति पनि असहमति जनाउँदै विद्यार्थीले आन्दोलनलाई जारी राखेका छन्। थाहाबाट

SHARE