कात्तिक ११, २०७६ काठमाडौं . तिहारका बेला जुवाको खाल चलाउनेमाथि प्रहरीले धमाधम धरपकड जारी राखेको छ । देशका विभिन्न स्थानबाट लाखौँको हारजित हुने गरी जुवातास खेलिरहेको अवस्थामा प्रहरीले सय भन्दा धेरैलाई पक्राउ गरिसकेको छ। शनिबार राति काठमाडौंको महाराजगञ्जबाट २ करोड ६७ लाख रुपैयाँसहित धनाढ्य जुवाडे पक्राउ गरेको प्रहरीले गुल्मीमा जुवा खेल्दै गरेका १७ जनालाई पक्राउ गरेको छ। गुल्मीको दरवार गाउँपालिका(७ गलाम बस्ने निलासिंह अधिकारीको घरमा जुँवा खेली रहेका १७ जना पक्राउ परेको जिल्ला प्रहरी कार्यालय गुल्मीका प्रहरी नायव उपरीक्षक मिनबहादुर घलेले बताए । प्रहरीले जुवाको खालबाट २ लाख ८२ हजार रुपैयाँ नियन्त्रणमा लिएको प्रहरीले जनाएको छ । जुवा खेलीरहेको अबस्थामा नियन्त्रणमा लिएका १७ जनालाई जिल्ला प्रहरी कार्यालय गुल्मीमा राखिएको प्रहरी नायव उपरीक्षक घलेले बताए । त्यसैगरि दाङको लमही नगरपालिकाका रत्नप्रसाद श्रेष्ठको घरमा जुवा खेलिरहेको अवस्थामा प्रहरीले आठजनालाई पक्राउ गरेको छ । उनीहरुका साथबाट प्रहरीले ६ लाख ७८ हजार बरामद गरेको छ । जिल्ला प्रहरी कार्यालयका प्रहरी प्रवक्ता विनोदविक्रम शाहकाअनुसार पक्राउ पर्नेमा जुवा खेलाउने श्रेष्ठ, लमही नगरपालिका(८ का प्रकाश खड्का, सोही ठाउँका कर्णबहादुर बुढाथोकी, खिम पुन, अशोककुमार खड्का, लमही नगरपालिका(३ का अमरबहादुर तामाङ, वडा नं ६ का भिविराज किराती र लमही(५ का मुकेश चौधरी छन् । इलाका प्रहरी कार्यालय लमहीको टोलीले उनीहरुलाई पक्राउ गरेको हो। उनीहरुविरुद्ध मुलुकी अपराधसंहिता ऐन, २०७४ को परिच्छेद ५ को दफा १२५ को जुवासम्बन्धी कसुरमा मुद्दा दर्ता गरी आवश्यक कारवाही अगाडि बढाइने शाहले बताए।
चितवनमा २० जना पक्राउ
पूर्वी चतवनको खैरहनीबाट २० जना जुवाडे पक्राउ परेका छन् । इलाका प्रहरी कार्यालय खैरहनीबाट खटिएको प्रहरी टोलीले खैरहनी नगरपालिका–१ सिमलघारीमा गए राति कौडा खेलिरहेका २० जनालाई पक्राउ गरेको हो। विशेष सुराकीका आधारमा कयर खोलाको छेउमा रहेको एउटा घरमा कौडा खेलिरहेको अवस्थामा उनीहरुलाई पक्राउ गरिएको इलाका प्रहरी कार्यालय खैरहनीका प्रहरी निरीक्षक धनदेव साउदले जानकारी दिए। उनीहरुको साथबाट एक लाख ९१ हजार बरामद भएको प्रहरीले जनाएको छ। त्यस्तै प्रहरीले १२ वटा मोटरसाइकलसमेत बरामद गरेको जानकारी दिएको छ। यसैगरी नारायणी नदीको पुलबाट हाम फालेका एक जनाको मृत्यु भएको छ । अर्का एक जना बेपत्ता भएका छन् । इलाका प्रहरी कार्यालय नारायणगढले दिएको जानकारीअनुसार आइतबार अपराह्न ४ बजे हाम फालेका अन्दाजी ३०÷३५ वर्षीय पुरुषको शव नदी किनारमा फेला पारिएको हो ।
