कात्तिक ९, २०७६ बागलुङ . बागलुङको तमानखोला गाउँपालिका–३ रिकलाङमा शुक्रबार राति भएको पिकअप जिप दुर्घटना परी सोही जिपका चालक र सहचालकको मृत्यु भएको छ। तमानखोला गाउँपालिका वडा नम्बर ३ तमानदेखि बोङगादोभान बजारतर्फ आउँदै गरेको ध१ज ७०५ नम्बरको पिकअप जिप रिक्लाङमा दुर्घटनामा परेको हो। शुक्रबार राति ८ बजे भएको दुर्घटनामा परी जीपमा सवार दुवै जनाको मृत्यु भएको जिल्ला प्रहरी कार्यालय बागलुङले जनाएको छ। मृत्यु हुनेमा तमानखोला गाउँपालिका–१ का जिप चालक झकबहादुर विक र सोही स्थानका सह–चालक ओमबहादुर गोतामे छन्। उनीहरुको घटनास्थलमै मृत्यु भएको जिल्ला प्रहरी कार्यालय बागलुङ प्रहरी प्रमुख प्रहरी उपरिक्षक नवराज भट्टले जानकारी दिए। पिकअप सडकदेखि करिब एक हजार २०० मिटर तल खसेको बोङ्गादोभान प्रहरी चौकीले जनाएको छ। यात्रु छोडेर फर्कदै गरेको जिप घुम्तीमा साँघुरो सडकमा मोड्ने क्रममा दुर्घटना भएको हुनसक्ने प्रहरीले जनाएको छ। रातको समयमा दुर्घटना हुँदा उद्दारमा निकै समस्या भएको प्रहरीले जनाएको छ। शव राति नै पोष्टमार्टमका लागि ढोरपाटन नगरपालिका–१ वुर्तिवाङ स्वास्थ्य केन्द्रमा ल्याइएको भट्टले जानकारी दिए।
