पुस ३,२०७७ अर्घाखाँची : अर्घाखाँची जिल्लाको छत्रदेव गाउँपालिका वडा नं। ८ मा चार वर्षअघि शुरु भएको एक खानेपानी आयोजना समितीको ढिलासुस्तीका कारण समयमै सम्पन्न हुन नसक्दा उपभोक्ता निराश बनेका छन । खानेपानी आयोजनाको २०७३ सालमा निर्माण तथा उपभोक्ता समिति गठन भई ०७४ देखि काम सुरु भएपनि ०७८ साल सुरु हुनै लाग्दासमेत सम्पन्न भएको छैन ।
यतिबेला साविक अर्घातोष गाविस वडा न ४ र ५ मा लिफ्टिङ् खानेपानीको काम सम्पन्न भई धारामा पानी आउने बेला भएपनि समितीले काम गर्न नसक्दा पानी आउन त परको कुरा हो निर्माण समेत सम्पन्न भएको छैन । अर्घातोष बेतारी भन्ने ठाउमा बेस ट्याङ्की बनाई त्यहाँबाट करिब २।५ कि मि उत्तरपूर्वमा कालिका कोट नजिकै ट्याङ्की वनाई वरिपरि वितरण गर्ने योजना थियो ।उक्त खानेपानी आयोजनाका लागि लुम्बिनी प्रदेश सरकार तथा छत्रदेव गाउँपालिकाबाट समपुरक अनुदानमा ५० लाख रुपैयाँ विनियोजन भएको थियो ।
उक्त ठाउँमा अहिले ७५ हजार घनलिटर पानी अट्ने दुइ ट्याङ्की निमार्ण भएका छन् तर बिद्धुतको काम बाँकी रहेको बाहाना देखाएर समितीले बाँकी काम गर्न रुचि देखाएको छैन । मोटर जडान गर्न र आयोजनाको समग्र विद्युत विकास तथा विस्तारका लागि भन्दै गत वर्ष गाउँपालिकाले उपलब्ध गराएको थप १३ लाख रुपैयाँ पनि खर्च भईसकेको समितीले जानाएको छ ।
खानेपानी समितीकाअनुसार जिल्ला खानेपानी कार्यालयबाट पनि करिब २२ लाख हाराहारी रकम प्राप्त भइसकेको छ ।आयोजना शुरु गर्दा अर्घातोष साविक ४ र ५ का लागि लक्षित गरिएपनि पछि ३ नं लाई पनि समेटेर उपभोक्ताको संख्या करिब ३०० पुर्याईएको अध्यक्ष राजेन्द्र पौडेलले बताउनुभयो ।
केमा अड्क्यो हलो
बेसिक ट्याङ्की निमार्ण भएको जग्गा स्थानीय यमलाल पौडेल, सुकदेव पौडेल र हालका समिती अध्यक्ष राजेन्द्र पौडेल समेतले आयोजनालाई दिनेगरी काम गरियो । स्थानीय भन्छन् हाल जग्गा पास गरी आयोजनाकै नाममा जग्गाधनी प्रमाणपत्र नभएका कारण विद्युत् प्राधिकरणले मिटर दिन नमिल्ने बताएको छ । समितीका अध्यक्ष राजेन्द्र पौडेलले जग्गा हस्तान्तरणमा समस्या नभई समितीले निणर्य गर्न नसक्दा काम अघि बढाउन ढिलो भएको प्रतिक्रिया दिनुभयो ।
तपाईँ आफै अध्यक्ष भएर किन बैठक बोलाएर निर्णय गराउन नसकेको भन्ने प्रश्नमा पौडेलले भन्नुभयो । “मैले सचिव जीलाई विगत ६ महिनादेखि बैठक बोलाउँ भनेको छु,” समितीका अन्य सदस्यहरुतर्फ संकेत गर्दै अगाडि भन्नुभयो “उहाँहरु बैठक बस्ने, सहयोग गर्ने कुरामा त्यति आउनुभएको छैन । मैले मात्रै चाहेर पनि त बैठक बस्न सक्ने कुरा भएन नि ।” कतिपय सदस्यहरु कैयौँपटक खबर गर्दासमेत बैठकमा नआउने गरेकाले पनि समस्या भएको पौडेलको गुनासो थियो । तर समितीकै कतिपय सदस्यहरुले चाहिँ अध्यक्ष निकै निष्क्रिय भएको र नियतवस काममा ढिलाई गरिरहेको आरोप लगाएका छन् ।
बैठकको सूचनाबारे समिती सदस्य रामप्रसाद खनालसँग जिज्ञासा राख्दा उहाँले अध्यक्षको भनाईको ठाडै प्रतिवाद गर्नुभयो र भन्नुभयो, “वहाँनै बैठक राख्ने संस्थागत निर्णय गर्ने कुरामा आउनुहुन्न, खाली ठेक्का र खरिदमा मात्रै आफुखुशी गर्ने अनि बिनामहत्वका विषयमा औपचारिकता पुरा गर्न बोलाउने गर्न त भएन नि ।”
स्थानीयका अनुसार ट्याङ्की बनेका छन्, पाईप आइसकेको छ, विद्युत् मोटर जडानको काम भईरहेको छ तर, समितीले कामको भ्याउ पाउन नसक्दा आयोजना लथालिङ्ग अवस्थामा छ । आयोजनाको शुरुवातमै स्थानीय चन्द्रमान श्रेष्ठको अध्यक्षतामा समिती गठन भएपनि उक्त समितीले काम गर्न नसकी हालको समिती गठन गरिएको थियो । समितीभित्रकै मतमतान्तरले गर्दा आयोजना अन्तिम चरणमा पुग्दासम्म मूहान दर्ताको प्रकृया समेत अघि बढेको छैन ।
के भन्छन् नियामक निकाय ?
यसबारे वडा कार्यालय मानीपोखरामा सम्पर्क गर्दा वडाले पनि समितीलाई पटक पटक समयमै काम सम्पन्न गर्न सचेत गराएको खुलेको छ । वडाअध्यक्ष राजकुमार श्रेष्ठले भन्नुभयो “त्यहाँ हामीले पटक पटक काम छिटो गर्न भनिरहेका छौँ, मूहान दर्ताको औपचारिक प्रस्ताव आउनेबित्तिकै आवश्यक प्रक्रियाबमोजिम गाउँपालिका बाट प्रमाणपत्र जारी हुन्छ । त्यो प्रस्ताब ल्याउनुस् भनेका छौँ सायद आजभोलिमै केही आउला ।”गत वर्षको दशैँमा नै घरघरमा पानी आउँछ भनेर वाचा गरेका वडाअध्यक्ष श्रेष्ठलाई पनि यसमा भएको ढिलाईले नैतिक समस्यामा पारेको देखिन्छ । आयोजना कहिले पुरा हुन्छ र कहिले पानी आउँछ भन्ने स्पष्ट जवाफ अझै पनि प्राप्त हुन सकेको छैन । काममा भएको ढिलाईले आमउपभोक्ता भने निराश छन् ।
