सुशीला रेग्मी
रामपुर (पाल्पा), ९ चैत : पाल्पाको रामपुरमा दूध, अण्डा र मासु खाऔँ स्वस्थ रहौँ भन्ने नारासहित सचेतना कार्यक्रम भएको छ ।

भेटेरिनरी अस्पताल तथा पशुसेवा विज्ञ केन्द्र तानसेन पाल्पाको आयोजनामा रामपुरका मासु व्यावसायी दुग्ध व्यावसायी, दुध, मासु, अण्डा उत्पादक कृषकलाई तालिम दिइएको हो । कार्यक्रम भेटेरिनरी अस्पताल तथा पशुसेवा विज्ञ केन्द्र पाल्पाका निमिक्त प्रमुख दुर्गाप्रसाद खनाल अध्यक्षतामा चलेको हो । उहाँले हाम्रो शरीरको लागि आवश्यक तत्वहरु दुध, अण्डा र मासुबाट पूर्ण मात्रामा पाउन सकिने बताउनुभयो । उहाँले दुध तथा मासुजन्य पदार्थको सेवनबाट शरीरलाई निरोगी र ऊर्जावान बनाउन ठूलो सहयोग गर्ने तथा पशुपालक कृषकहरुको प्रवद्र्धनमा टेवा पुग्ने बताउनुभएको छ ।

कार्यालयका पशु चिकित्सक नविन बस्यालले पाल्पा जिल्लामा दुध, अण्डा, मासुको उत्पादन सम्बन्धमा सहजिकरण गर्नुहुदै प्रतिव्यक्ति पशुजन्य पदार्थमध्ये वार्षिक रुपमा दुध ९१ लिटर, मासु १४ किलो, माछा पाँच किलो र अण्डा ४८ गोटा आवश्यकता रहेको बताउनुभएको छ । पाल्पा दुध, मासु र अण्डामा आत्मनिर्भर रहेपनि माछा उत्पादन न्यून रहेको बताउनुहुदै जिल्लामा प्रतिव्यक्ति दुध १९८ लिटर, मासु २४ दशमलव ३५ किलो, माछा ३२ ग्राम र अण्डा ६६ गोटा आपूर्ति रहेको तथ्याङ्क पशुचिकित्सक बस्यालले बताउनुभयो ।

कार्यक्रममा सीताकुण्ड दुग्ध उत्पादक सहकारी संस्थाका अध्यक्ष कृष्णकुमार अर्यालले रामपुर क्षेत्रमा व्यावसायीक पशुपालनमा कृषकको आकर्षण बढ्दै गएको हुदा खानपानमा विशेष ध्यान दिएर स्वस्थ रहनुपर्ने बताउनुभएको छ । नेपाल बाख्रापालक किसान महासंघका केन्द्रिय उपाध्यक्ष सुर्यप्रसाद रेग्मीले पाल्पा पशुपालनको लागि राम्रो सम्भावना बोकेको जिल्ला भएको बताउनुहुदै दूध, मासु र अण्डाको गुणस्तर उत्पादनमा लाग्नुपर्नेमा जोड दिनुभएको छ ।

कार्यक्रमको संचालन रामपुर नगरपालिका पशुसेवा शाखा प्रमुख तुल्सिराम काफ्लेले गर्नुभएको हो । स्वागत भेटेरिनरी अस्पताल तथा पशुसेवा विज्ञ केन्द्रका पशुसेवा प्राबिधिक युवराज ज्ञवालीले गर्नुभएको थियो ।

सुशीला रेग्मी
चैत ६,२०७९ पाल्पाः धार्मिक तथा पर्यटकिय क्षेत्र कालीगण्डकीको तटमा रहेको केलादीधाममा ज्येष्ठ नागरिकले धार्मिक अवलोकन भ्रमण गर्नुभएको छ ।

तानसेन नगरपालिका वडा नं ९ को ६८ वर्ष माथिका ११० जना ज्येष्ठ नागरिकलाई केलादी, रामपुरको गौशाला, तालपोखरा, दुर्गामन्दिर लगायतका क्षेत्रको अवलोकन भ्रमण कार्यक्रम आयोजना गरेको तानसेन ९ का वडाध्यक्ष राजेशकुमार अर्यालले जानकारी दिनुभएको छ । केलादीमा थप संरचना विस्तार गरी यो क्षेत्र नेपालकै महत्वपूर्ण धार्मिक पर्यटन क्षेत्र बन्ने वडाध्यक्ष अर्याल बताउनुहुन्छ ।

चापाकोट नगरपालिका वडा नं ६ का वडाध्यक्ष तारा पोखरेलले केलादीधाम क्षेत्रलाई छनौट गरी अवलोकन भ्रमण गर्न आएकोमा टोलीलाई धन्यवाद दिनुभएको छ । राधा दामोदर नेपाल निम्वार्क पिठका सचिव घनश्याम खनालले केलादीको ऐतिहासिक तथा वर्तमान अवस्थाबारे जानकारी गराउनु भएको हो ।

मन्दिरका महन्त गोपाल शरण उपाध्यायले अवलोकन भ्रमण टोलीलाई आशिर्वाद दिदै भ्रमण गर्न आएकोमा धन्यवाद व्यक्त गर्नुभएको छ । रामपुर नगर गौशालाका अध्यक्ष हुमनाथ न्यौपानेले रामपुर क्षेत्रमा छाडा छाडिएका र उत्पादन दिन छाडेपछि हेयका रुपमा हेरिने गाईलाई संरक्षण गर्दै गौशाला निर्माण गरिएको जानकारी गराउनु भएको छ ।

गौशालामा १५४ वटा गाई व्यवस्थापन गरेर राखिएको छ । रामपुर नगरपालिका वडा नं ६ स्थित कालीगण्डकी नदी तट तातोपानीधाममा गौशाला निर्माण गरी संचालनमा ल्याइएको छ । रामपुर ६ मा रहेको दुर्गामन्दिरमा भ्रमण टोलीलाई स्वागत गरिएको छ । मन्दिरका संरक्षक दुर्गादेवी पोखरेलले मन्दिरको वस्तुस्थितीबारे जानकारी गराउनुभएको छ ।

सुशीला रेग्मी
चैत ४,२०७९ पाल्पाः पाल्पाको रामपुर नगरपालिकामा चलेको साङ्गीतिक व्यायाम सम्बन्धी तीन दिने तालिम सकिएको छ ।

नगरभित्रका सामुदायिक विद्यालयका शिक्षक एवम् विद्यार्थीहरुका लागी रामतुलसी नमुना माध्यमिक विद्यालयमा तालिम सञ्चालन गरिएको हो । सामाजिक विकास डिभिजन कार्यालय तानसेन पाल्पाको आयोजनामा भएको तालिममा रामपुर नगरपालिकाभित्र रहेका मावि (९–१०) र आधारभुत तह (१÷८) का २२ विद्यालयलाई लक्षित गरेर तालिम दिइएको छ ।

तीन दिनसम्म चलेको तालिमको सहजिकरण लुम्बिनी प्रदेश खेलकुद विकास परिषद् सदस्य हरिस ओलीले गर्नुभएको हो । रामतुलसी नमुना माध्यमिक विद्यालयका व्यवस्थापन समिति अध्यक्ष विष्णुप्रसाद पौडेलको अध्यक्षतामा भएको तालिम समापनका प्रमुख अतिथि रामपुर नगरपालिकाका उपप्रमुख बालकुमारी थापा रहनुभएको हो । शैक्षिक क्षेत्रमा यस तालिमले ठूलो सघाउ पुग्ने हुदा नगर उपप्रमुख थापाले यस्तै तालिम आवश्यक परेमा नगर सरकारले साथ सहयोग गर्ने बताउनुहुदै शैक्षिक कार्यक्रममा नगरपालिकाले प्राथमिकता दिएर काम गरिरहेको बताउनुभएको छ ।

रामपुर नगरपालिका शिक्षा अधिकृत विकल काफ्लेले तालिममा सिकेका सिपलाई सहभागी शिक्षकले आफु कार्यरत विद्यालयमा विद्यार्थीमाझ सीप सिकाउनुपर्ने बताउनुभएको छ ।

लुम्बिनी प्रदेशका १२ जिल्लामा पाल्पाको रामपुरमा पहिलो पटक सांगीतिक व्यायाम तालिम सुरु गरिएको छ । सामाजिक डिभिजन कार्यालय पाल्पाका लेखा प्रमुख जनार्दन लोधले पढेर मात्रै सबै ज्ञान सीप पुर्ण नहुने हुदा विभिन्न क्रियाकलाप गरेर ज्ञान आर्जन गर्न सकिने बताउनुभयो । उहाँले सामुदायिक विद्यालयमा लुम्बिनी प्रदेश अन्तर्गत पाल्पाको रामपुरमा मात्रै यो तालिम आयोजना गरिएको जानकारी दिनुहुदै यसै कार्यालय मार्फत गुल्मीको रेसुङ्गा नगरपालिकामा आयोजना गर्ने कार्यक्रम रहेको बताउनुभएको छ ।

कार्यक्रममा तालिमका सहजकर्ता लुम्बिनी प्रदेश खेलकुद परिषद सदस्य हरिस ओलीले प्रदेश सरकारले हरेक जिल्लामा दुई÷दुई लाख वजेट विनियोजन गरेको जानकारी दिनुहुदै व्यायाम अति महत्वपूर्ण रहेकाले हरेक विद्यालयमा यस्ता कार्यक्रम ल्याउनुपर्नेमा जोड दिनुभएको छ ।

तालिममा सहभागी दरैठाँटी माविका शिक्षक मानबहादुर कँुवरले सामुदायिक विद्यालयको नतिजा सुधार्नका लागि पढाई मात्रै नभई साङ्गीतिक व्यायाम अति आवश्यक रहेकाले यस्तै खालका तालिमबाट नयाँ कुरा विद्यार्थीमाझ सिकाउन सकिने अनुभव बताउनुभएको छ ।

सीताराम माविका शिक्षक सरस्वती श्रेष्ठको स्वागतबाट सुरु भएको कार्यक्रममा सहभागीलाई रामतुलसी माविका शिक्षक रामभक्त पराजुलीले धन्यवाद र संचालन नवदुर्गा माविका शिक्षक दिपेन्द्र भट्टराईले गर्नुभएको हो ।