कीर्गिस्तानमा हुने नादेज्दा कप महिला फुटबल प्रतियोगितामा सहभागिता जनाउन नेपाली महिला फुटबल टिम बुधबार त्यसतर्फ प्रस्थान गरेको छ ।

सेप्टेम्बर आठ ताखिरदेखि हुने प्रतियोगिताका लागि नेपाली टिमलाई राष्ट्रिय खेलकुद परिषद्का सदस्यसचिव रमेशकुमार सिलवालले बिदाइ गरे ।

बिदाइ कार्यक्रममा सिलवालले खेलाडीले खेल्नु अगाडि बीमा बिनाको खेलमा स्विकृति नदिन निर्देशन दिएका छन् । कुनै पनि प्रतियोगितामा सहभागिता जनाउन जानु भन्दा खेलाडी र रेफ्रिको बीमा अनिवार्य गराउनु पर्ने, यदि बीमा नभएको प्रतियोगितामा सहभागिताका लागि स्विकृति नै दिन नहुने उनले बताए ।

यसका साथै खेलाडीले जुन पायो त्यही प्रतियोगितामा सहभागि हुन पनि रोक्नुपर्ने उनले बताए । उनले भने एन्फाले निश्चित क्यालेन्डर बनाएर, कसरी प्रतियोगिता व्यवस्थापन गर्न सकिन्छ, त्यो अब गर्नुपर्ने र यदि एउटै खेलाडी सबै प्रतियोगितामा खेल्न जाँदैछन् भने उनीहरुलाई कसरी आराम पुग्ने गरी प्रतियोगितामा सहभागिता गराउनु पर्ने हो त्यो एन्फाले गर्नुपर्छ ।

खेलाडी घाइते भएपछि कसले जिम्मेवारी लिने, उनीहरुको प्रदर्शन कसरी राम्रो गराउन सकिन्छ भन्नेमा ध्यान दिन अब ढिलो नगर्नुपर्ने सिलवालको भनाइ थियो । उज्यालो अनलाइनबाट

विश्व नम्बर दुई टेनिस खेलाडी राफेल नाडाल यूएस ओपन टेनिसको सेमिफाइनलमा प्रवेश गरेका छन् । विहीबार भएको क्वार्टरफाइनलमा अर्जेन्टिनी खेलाडी डिएगो स्वाट्र्जम्यानलाई ३–० को सोझो सेटमा हराउँदै नाडाल अन्तिम चारमा प्रवेश गरेका हुन् । १८ पटकका ग्राण्डस्लाम विजेता स्पेनिस स्टार नाडालले २१ औं वरीयताका डिएगोलाई ६–४, ७–५ र ६–२ को सेटमा हराए । फाइनल प्रवेशका लागि अब नाडालले इटालीका माटियो बेरेट्टिनीसँग प्रतिस्पर्धा गर्नेछन् । उज्यालो अनलाइनबाट

हरितालिका तिज हिन्दू नारीहरूले मनाउने एउटा महत्वपूर्ण चाड हो । यो पर्वलाई श्रीमान श्रीमतीको सम्बन्धलाई प्रगाढ बनाउने पर्वका रुपमा पनि लिइन्छ । श्रीमतीले श्रीमानको दीर्घायुको लागि व्रत बस्ने र पूजाआजा गर्ने यो पर्वको विशेषता हो । यो पर्वमा विवाह नभएकाले राम्रो श्रीमान पाउँ भनेर माग्दा त्यो माग भगवान शिवजीले पूरा गरिदिने विश्वास छ ।

यो पर्व मुख्य रूपले नेपालभर मनाइन्छ भने भारतका कुनै कुनै प्रान्तमा पनि मनाइन्छ । हिन्दू धार्मिक ग्रन्थ अनुसार हिमालयले आफ्नी छोरी पार्वतीको कन्यादान भगवान विष्णुसँग गरिदिने वचन पार्वतीलाई मन नपरे पछि आफूले मन पराएको वर पाउन जंगल गएर शिवजीको तपस्या गर्न थालिन् ।

पार्वतीको कठोर व्रतको कारण शिवजी प्रकट भएर चिताएको कुरा पुगोस् भनी आशिर्वाद दिएपछि शिव पार्वतीको विवाह हुन पुग्यो । यही कारण तिज पर्व मनाउने गरिन्छ । आज हामीले तिजको अवसरमा महिला सेलिब्रेटीहरुको बारेमा चर्चा गर्दैछौँ  ।

दीपाश्री निरौला

विगत २७ वर्षदेखि कलाकारितामा सक्रिय दीपाश्री अभिनयमा सफल भएपछि निर्देशनमा हात हालिन् र सफलता पनि पाइन् । छक्का पञ्जाबाट निर्देशनमा डेब्यू गरेकी दीपाश्रीले डेब्यू निर्देशनबाटै कीर्तिमानी निर्देशकको परिचय पाइन् । काममा निकै मेहनत गर्ने दीपा धर्मकर्ममा पनि रुचि राख्छिन् । अझ शिव भगवानसँग उनको निकै नै लगाव छ ।

कोमल वली

गायिका, सञ्चारकर्मी तथा सांसद कोमल वलीका लागि तिज विशेष हुन्छ । उनी हरेक वर्ष तिजमा तिज गीत सार्वजनिक गर्ने गर्छिन् । केही वर्ष अघि मात्रै उनले पोइल जान पाम् भन्दै शिवजीलाई पुकारेको गीतले खुबै चर्चा पायो ।

उमेरका हिसाबले कोमल अहिले ५० कटिसकेकी छिन् । कोमलले कहिले पोइल जान पाम्, कहिले भेटिएन कोही जस्ता गीत गाएकी छिन् ।

निरुता सिंह

दार्जिलिङमा जन्मेर नेपाली सिनेमामा सफलता पाएकी निरुता अहिले मुम्बइमा बसोबास गर्दै आएकी छिन् । केही भारतीय विज्ञापन र सिरियलहरुमा समेत काम गरेकी निरुताले केही वर्षको अन्तरपछि नेपाली सिनेमामा पनि काम गरिन् ।

नाईँ नभन्नु ल ५ बाट कमब्याक गरेकी निरुताले त्यसपछि सिनेमा दाल भात तरकारीमा काम गरिन् ।

ऋचा शर्मा

अभिनेत्री ऋचा शर्माले पनि जीवनका तीन दशक काटिसकेकी छिन् । ‘फस्ट लभ’बाट सिनेमा क्षेत्रमा प्रवेश गरेकी ऋचा एकताका अभिनेता विनय श्रेष्ठसँगको प्रेमका कारण चर्चामा थिइन् ।

ऋचासँग अलग भएर विनयले ब्युटि थेरापिस्ट एनी थापासँग विवाह गरेर एक सन्तानका पिता बनिसकेका छन् । ऋचा भने यही वर्ष विवाह गर्ने तयारीमा छिन् । उनले आफ्नो विवाह यही वर्ष हुने तर कहिले भनेर पक्का नभएको बताउँदै आएकी छिन् ।

नम्रता श्रेष्ठ 

अभिनेत्री श्रेष्ठ अझै केही वर्ष सिनेमा क्षेत्रमा नै बिताउने बताउँछिन् । केही समय अघिमात्रै नम्रताले अभिनय तथा निर्माण गरेको सिनेमा जाइराले सामान्य व्यापार गरेको थियो ।

पूजना स्त्री

तीन दशक पार गरेकी पूजनाले सिनेमा ‘चक्लेट’ निर्माण गरिन् र आफैँ खेलिन् पनि । तर सिनेमाले सफलता भने पाएन । सडक बालबालिकाको कथालाई मुख्य विषयवस्तु बनाएर निर्माण गरिएको यो सिनेमाको असफलतापछि उनले सामाजिक सञ्जालमा नआउने निर्णय लिएर चर्चा पाएकी थिइन् ।

पूजना पुष्पराज पुरुषसँग प्रेममा रहेको चर्चा छ । पूजना अहिले सिनेमा क्षेत्रबाट पनि टाढा भएकी छन् ।

सम्झना बुढाथोकी

चार दशक टेक्न आँटेकी सम्झनाले मोडलिङमा सफलता पाइन् । लामाे समयसम्म उनले निर्देशक तथा मोडल शंकर बिसीसँग सँगै काम गरिन् ।

शोभा त्रिपाठी 

विगत १५ वर्षदेखि सञ्चारक्षेत्रमा सक्रिय शोभा पनि तीस काटिसकेकी छिन् । तर उनी आफ्नो उमेर सार्वजनिक गर्न चाहन्नन् । हरेक सालको तिजमा उनले विभिन्न तिज विशेष गीतहरु बजारमा लिएर आउने गरेकी छन् ।

सुनिता दुलाल

अर्की गायिका सुनिता दुलाल पनि तीन दशक पार गरिसकेकी छिन् । केही वर्ष अघि उनले आफैँले आफू विवाह गर्ने तयारीमा रहेको हल्ला चलाएकी थिइन् । उनले हरेक वर्षको तिजलाई गीतमार्फत विशेष बनाउने गरेकी हुन्छिन् ।

उनी हरेक वर्ष तिज विशेष गीतहरु निकाल्ने गर्छिन् । यो वर्ष भने उनी नेपाली रियालिटी शो लोकस्टारमा जजको भूमिकामा छिन् ।  उनका ‘दर खाने दिन’ अब त मैलै नी झुम्का लगाउँछु, यस पाली नी खाने हो दर, नाचौँ सरर लगायतका तिज गीतहरु चर्चामा छन् । उज्यालो अनलाइनबाट

गणेश चतुदर्शीको अवसरलाई बलिउडकर्मीहरू विशेष महत्व दिन्छन्। हरेक कलाकारले आफ्ना घरमा उत्सव मनाँउछन्। हरेक कलाकारले आफ्ना घरमा गणपति बाबाको मूर्ति निर्माण गर्छन्। यस्तै बलिउडका दबङबोय सलमान खानले आफ्नी बहिनी अर्पिता खानको घरमा गणपति बाबाका पूजा गरेका छन्। खान परिवार सरिक भएको पूजामा केटरिना पनि सामेल भएकी थिइन्। अर्पिताले केटरिना कैफलाई विशेष रूपमा निमन्त्रणा गरेको बताइएको छ। कैफले पनि पूजा गरेको भिडियो सामाजिक संजालमा भाइरल बनेको छ। उक्त भिडियोमा  क्रिश्चियन धर्ममा आस्था राख्ने कैफले धर्मको सम्मान गरेको भन्दै  सामाजिक संजालमा सकारात्मक टिप्पणी भइरहेको छ।थाहा खबरबाट

प्रश्न : म २४ वर्षको छु। अविवाहित हुँ। तर, मेरो स्तनबाट दूध चुहिने समस्या देखिएको छ? निकै तनावमा छु। के हो स्तनबाट दूध चुहिने समस्या? के कारणले हुन्छ र उपचार के हो ? – एस

उत्तर : जिज्ञासाका लागि धन्यवाद। तपार्इ‌को जस्तै समस्या भएका धेरै युवतीको उपचार भइसकेको छ। त्यसकारण तनाव नलिनु होला। केही समयअघि राजधानीको एक कलेजमा स्नातक तहमा अध्ययनरत २१ वर्षीया युवतीले कक्षामा पढिरहेको समयमा अनौठो अनुभूति गरिन् । अचानक छाति चिसो भएर आयो । तत्काल त्यति वास्ता गरिनन् । तर छाति भिज्ने क्रम बढ्दै थियो । घरमा आएर हेर्दा स्तनबाट दूध चुहिएको थियो । सुरुमा अनौठो लागेपनि यसलाई उनले गम्भीर रुपमा लिइनन् । तर अविवाहित उनमा यो समस्या बारम्बार दोहोरिने गर्न थालेपछि उनी निकै तनावमा परिन् । र एक साथीको सुझावअनुसार चिकित्सककहाँ पुगिन् । खासमा उनमा यो समस्या प्रोल्याक्टिन हर्मोनका कारणले भएको रहेछ ।

के हो स्तनबाट दूध चुहिने समस्या?
स्तनपान गर्ने बच्चा नहुँदा वा अविवाहित महिलाको स्तनबाट दुध चुहिने समस्या भइरहेको हुन सक्छ । के कारणले दुध चुस्ने बच्चा नभएको समयमा पनि स्तनबाट दुध बगिरहन्छ ? यसबारे जानकारी हुनु आवश्यक छ।

हाम्रो मस्तिष्कमा पिट्युरी ग्रन्थी हुन्छ । यसबाट प्रोल्याक्टिन हार्मोन उत्पादन हुन्छ । यो हार्मोनको काम स्तनको विकास गर्ने र बच्चा जन्मिएपछि दूध बनाउने हो । यो हार्मोन आवश्यक मात्रामा उत्पादन भइरह्यो भने केही असर पर्दैन । तर यसको मात्रा बढ्यो भने स्तनपान नगराउने महिला, अविवाहित महिला तथा पुरुषमा पनि दूध चुहिने समस्या हुन सक्छन् । प्रोल्याक्टिन हर्मोनको मात्रा बढ्ने अवस्थालाई ‘हाइपरप्रोल्याक्टिमेनिया’ भनिन्छ।

पिट्टुयरी ग्रन्थीमा कुनै कारणवश पलाउने ट्युमर, विभिन्न औषधिको असर वा अन्य कुनै रोगका कारण हार्मोनको मात्रा बढेको हुनसक्छ । खासगरि ग्याष्ट्रिक, साइकाट्रिससम्बन्धी औषधिको प्रयोग, धेरै कसिलो लुगा लगाउँदा या मस्तिष्कमा कुनै चोट लागेको भएपनि यो समस्या देखिन सक्छ।

यस्तो समस्या विश्वका १ प्रतिशत मानिसमा देखिन्छ । दुध चुहिने समस्या महिला–पुरुष दुवैमा देखिन्छ । तर बढी महिलामा नै भएको पाइन्छ । समयमा उपचार गरेमा यसको समस्याबाट मुक्ति पाउन सकिन्छ । यो धेरै देखिने रोग भने होइन।

प्रोल्याक्टिनोमालाई सामान्यतः २ प्रकारमा छुट्याउन सकिन्छ : 
माइक्रोएडेनोमा ट्युमर १० मिलिमिटरभन्दा सानो हुन्छ । त्योभन्दा ठूलो ट्युमर छ भने म्याक्रोएडेनोमा भनिन्छ । माइक्रोएडेनोमा प्रोल्याक्टिनोमको उपचारका लागि औषधि नै प्रयोग गरिन्छ । तर म्याक्रोएडेनोमा छ भने शल्यक्रिया पनि गरिन्छ ।

कस्तो देखिन्छ लक्षण ? 
प्रोल्याक्टिन हार्मोनको मात्रा बढेपछि महिला–पुरुषमा विभिन्न लक्षण देखिन थाल्छन् । यौनसम्पर्क गर्न मन नलाग्ने, अल्छी लाग्ने, महिलामा महिनावारी अनियमित हुने, घाँटी दुख्ने वा संक्रमण हुनेजस्ता लक्षण देखिन सक्छन्।

यस्तै, बाँझोपन, हड्डी कमजोर हुने तथा योनीमा दुखाई हुनेजस्ता समस्या हुन सक्छन् । आँखामा पनि विभिन्न समस्या देखिन्छन् । किनकि अप्टिक नली पिट्युरी ग्रन्थीनजिकै हुन्छ । यो ग्रन्थीमा समस्या आउनेबित्तिकै अन्य सहायक नलीको विकासमा समेत रोकावट ल्याउन सक्छ । पुरुषहरुमा स्तन बढ्ने पनि हुनसक्छ ।
यो रोग उपचारबाट निको हुन्छ । तर औषधि भने लामो  समय लिनुपर्छ । कम्तिमा दुई वर्षदेखि सात–आठ वर्षसम्म पनि औषधि सेवन गर्नुपर्ने अवस्था आउन सक्छ । स्तनपान गराउने महिले स्तनपान गराउन छाडेपछि पुन औषधि खानुपर्ने पनि हुनसक्छ । सामान्यता औषधि दिएरै प्रोल्याक्टिनको उपचार गरिन्छ । पिट्युरी ग्रन्थीमा ट्युमर पलाएको छ भने शल्यक्रिया पनि गर्नुपर्ने हुनसक्छ।

मुख्यकुरा बुझ्नुपर्ने के हो भने हाइपरप्रोल्याक्टिमेनिया मष्तिस्कबाट आउने भएकाले आफ्नो बे्रेनलाई हरेक समस्याबाट मुक्त राख्नुपर्छ । छातीको समस्याले पनि यस्तो समस्या हुनसक्छ । कहिलेकाँही क्यान्सरको सम्भावना हुने भएकाले यस्तो समस्या देखिए  तत्काल चिकित्सको परामर्श लिनुपर्छ ।

डा दीना श्रेष्ठ, (नर्भिक अस्पतालमा कार्यरत डा श्रेष्ठ  इन्डोक्राइनोलोजिस्ट हुन्)

स्वास्थ्य खबरबाट

काठमाडौं : १९ वर्ष मुनीको एशिया कप क्रिकेट आजदेखि श्रीलंकामा सुरु हुँदैछ।  प्रतियोगिता अन्तर्गत आजको खेलमा भारत र कुवेत तथा अफगानिस्तान र पाकिस्तानबीच प्रतिष्पर्धा हुनेछ। समूह बी मा रहेको नेपालले भने नेपालले पहिलो खेल आयोजक श्रीलंकासँग भोलि खेल्नेछ।  नेपाल रहेको समूह ‘बी’ मा श्रीलंकासहित बंगलादेश र युएई रहेका छन्। समूह ‘ए’ मा भारत, पाकिस्तान, अफगानिस्तान र कुवेत छन्। यो प्रतियोगिताको आठौं संस्करण हो। यसअघि भएका सात संस्करणमा भारतले एकपटक पाकिस्तानसँग संयुक्त उपाधिसहित ६ पटक प्रतियोगिताको उपाधि जितेको छ। सन् २०१७ मा भने अफगानिस्तानले उपाधि जितेको थियो । नेपाल भने अहिलेसम्म प्रतियोगिताको फाइनलमा पुग्न सकेको छैन्।
थाहा खबरबाट

हिजोआज  देशैभरि डेंगुको चर्चा र त्रास छ। यससँगै डेंगु परीक्षण गर्ने किटको अभाव र मूल्यका बारेमा पनि बेलाबेलामा चर्चा हुने गरेको छ।

डेंगुको संक्रमण भए/नभएको प्रोयागशाला परीक्षणबाट थाहा पाउन  सकिन्छ। प्रयोगशालामा गरिने विभिन्न परीक्षणमध्ये किटबाट गरिने परीक्षण सजिलो, छिटो र बिना कुनै औजार–उपकरण गर्न मिल्ने परीक्षण हो। किटबाट परीक्षण गर्दा बिरामीको रगतमा एनएस १, आइजीएम र आइजिजी भए/नभएको हेरिन्छ।

यसमध्ये एनएस १ डेंगु भाइरसबाट निस्किने एन्टिजेन हो भने आइजिएम र आइजिजी हाम्रो शरीरले डेंगु भाइरस विरुद्ध बनाउने एन्टिबडी हो। किटबाट परीक्षण गर्दा अहिले अथवा हालै भएको रोग डेंगु हो/होइन यकिन गर्न एनएस १ र आइजिएमको मुख्य भूमिका हुन्छ।

एनएस १ एन्टिजेन डेंगु भाइरसकै हिस्सा भएकोले भाइरस  संक्रमण भएको पहिलो दिनदेखि नै परीक्षणमा एनएस १ पोजिटिभ देख्न थालिन्छ र पाँचदेखि सात दिनसम्म पोजिटिभ हुनसक्छ। सात दिनपछि परीक्षण गराउँदा एनएस १ नेगेटिभ हुँदैमा डेंगुको संक्रमण छैन भन्न मिल्दैन।

डेंगु भाइरसको  प्रवेशपछि हाम्रो शरीरले त्यसलाई चिनेर त्यसविरुद्ध विस्तारै पहिला आइजिएम र त्यसपछि आइजिजी बनाउन थाल्छ।  संक्रमणको तीन दिन जति पछि ५० प्रतिशत बिरामीमा, पाँच दिनपछि ८० प्रतिशत  जति बिरामीमा र १० दिनपछि ९९ प्रतिशत बिरामीमा आइजिएम पोजिटिभ हुन्छ। आइजिएमको मात्रा पहिला विस्तारै बढ्छ। संक्रमणको दुई हप्ता जतिमा सबभन्दा बढी हुन्छ र त्यसपछि घट्दै गई पूरै नेगेटिभ हुन दुईदेखि तीन महिनासम्म लाग्न सक्छ।

आइजिजीको मात्रा आइजिएमसँगै अथवा अलि अघिपछि गरेर बढ्छ। दुईदेखि तीन हप्तासम्म बढ्दै जान्छ  र त्यसपछि विस्तारै घट्न  थाल्छ। पूरै नेगेटिभ हुन भने ६ महिना अथवा बढी समय लाग्नसक्छ। कुनैकुनै व्यक्तिमा एक चोटीको संक्रमणपछि वर्षौंसम्म पनि आइजिजी पोजिटिभ हुनसक्छ। पहिला संक्रमण भएर निको भइसकेपछि फेरि संक्रमण हुँदा एनएस १ र आइजिजी संक्रमण भएकै दिनदेखि पोजिटिभ देखिन सकिन्छ।

त्यसैले किटबाट परीक्षण गराउँदा डेंगु पोजिटिभ मात्र नभएर एनएस १, आइजिएम र आइजिजीमध्ये कुनकुन पोजिटिभ हो, त्यो थाहा भए मात्र अहिले बिरामी हुने कारण डेंगु हो वा होइन थाहा पाउन सकिन्छ। एनएस १ पोजिटिभ भए अहिले डेंगु छ, एनएस १ नेगटिभ भए पनि आइजिएम पोजिटिभ छ भने बिरामीलाई डेंगु छ अथवा हालसालै भएको थियो भन्ने बुझिन्छ भने आइजिजी मात्रा पोजिटिभ भए त्यो वर्षौं अगाडि भएको डेंगुको कारण पनि हुनसक्छ।

बजारमा विभिन्न कम्पनीका किटहरु उपलब्ध छन्। किटबाट गरिने परीक्षण सजिलो भए पनि  सधैं भरपर्दो चाहिं हुँदैन। त्यसैले आवश्यकता अनुसार अन्य जटिल तर बढी भरपर्दो परीक्षणहरु गराउन सकिन्छ। तर डेंगुको उपचार रोगको नभई लक्षणको हुन्छ। डेंगुलाई हाम्रो शरीरको रोग प्रतिरोधात्मक क्षमताले आफैं परास्त  गर्ने र सो प्रक्रियामा बिरामीमा हुनसक्ने लक्षण र जटिलताको लागि मात्र चिकित्सकीय सहयोग चाहिने हुनाले किट या अन्य कुनै परीक्षण तुरुन्तै उपलब्ध भए पनि नभए पनि शंकाकै भरमा डेंगुको उपचार गरे पनि फरक पर्दैन।

(डा झा राष्ट्रिय जनस्वास्थ्य प्रयोगशालाकी निर्देशक हुन्)

स्वास्थ्य खबरबाट