तिलाचन पाण्डे
असार १०,२०८० गुल्मी : गुल्मीदरबार गाउँपालिकाले आगामी आर्थिक वर्षका लागि ४४ करोड ५४ लाख ३४ हजार २ सय रुपियाँको बजेट प्रस्तुत गरेको छ ।

आइतबार उपाध्यक्ष तारा थापा ढेंगाले प्रस्तुत गर्नुभएको बजेटमा चालु तर्फ ३३ करोड ६५ लाख ९६ हजार ७ सय र पुँजीगत तर्फ १० करोड ८८ लाख,३७ हजार ५ सय रुपियाँ गरी कुल ४४ करोड ५४ लाख ३४ हजार २ सयको बजेट रहेको छ ।

उपाध्यक्षले प्रस्तुत गर्नुभएको बजेटमा कृषि तथा पशुपालन,स्वास्थ्य पूर्वाधारहरुको निर्माण ,शैक्षिक पूर्वाधारहरुको निर्माण,भौतिक पूर्वाधार,खानेपानी तथा सरसफाई,संक्रामक रोगहरुका संक्रमण रोकथाम तथा नियन्त्रण,विपद ब्यवस्थापन,गुणस्तरीय र सर्वसुलभ सेवा प्रवाह,गाउँपालिकाका सडक स्तरोन्ती,क्रमागत रुपमा संचालनमा रहेका आयोजनाहरुको निर्माण कार्यलाई निरन्तरता,रोजगारी र स्वरोजगारी सृजना,फोहोरमैला ब्यवस्थापन,पूर्वाधार निर्माण र पर्यटन बिकास,लैंगिक समानता र सामाजिक समावेशीकरण , गुणस्तरीय र प्रभावकारी सेवा प्रवाहलाई बजेटले मुख्य प्राथमिकता दिएको छ ।

गाउँसभामा गुल्मीदरबार गाउँपालिकाको आर्थिक विधेयक २०८० र विनियोजन विधेयक २०८० प्रस्तुत गरिएको छ ।

तिलाचन पाण्डे
असार ९,२०८० गुल्मीः जलाधार संरक्षण र ,बन्यजन्तुका लागि गुल्मीमा ३८ वटा सुक्खा पोखरी निर्माण गरिएको छ ।
डिभिजन वन कार्यालय गुल्मीले पछिल्लो तीन वर्षमा जिल्लाका विभिन्न स्थानहरुमा ३८ वटा पोखरी निर्माण गरेको जनाएको छ ।

कार्यालयका सूचना अधिकारी मुना शर्माका अनुसार आर्थिक वर्ष २०७७।७८ मा तीन वटा , आर्थिक वर्ष २०७८।७९ मा संरक्षित वन अन्र्तगत १० वटा , पीडितसंग प्रदेश सरकार कार्यक्रम अन्र्तगत ५ र बन्य जन्तुका लागि पोखरी निर्माण कार्यक्रम अन्र्तगत ५ गरी २० वटा पोखरी निर्माण गरिएको हो ।

चालु आर्थिक वर्षमा एक वडा एक पोखरी अभियान कार्यक्रम अन्र्तगत रुरुक्षेत्र ,सत्यवती र रेसुङगा नगरपालिकाको भाडगाउँमा गरी ६ वटा पोखरी निर्माणको चरणमा रहेका छन् ।
यस्तै वन संरक्षण क्षेत्र बिकास कार्यक्रम अन्र्तगत रेसुङगा संरक्षित वन भित्र तीन वटा , मदाने संरक्षित वनमा दुई र थाप्ले सत्यवती सालिमेदह वन अन्र्तगत चार वटा पोखरी निर्माण भएको शर्माले बताइन् ।

सुक्खा पोखरी निर्माण गर्दा जलाधार संरक्षण , बन्यजन्तुहरुका लागि , सौन्दर्यताका लागि र पानीका मुहानहरु नसुक्ने भएकाले यसरी पोखरी निर्माण गर्ने गरेको शर्माको भनाई छ ।
पालिकाका आठ पोखरी
यता जिल्लाको कालीगण्डकी गाउँपालिका गुल्मीले एक गाउँ एक पोखरी निर्माणको अभियान चलाएको छ ।
पानीका मुहानहरु सुक्दै जाने र पशुपन्छीहरुका लागि सहज रुपमा पानीको ब्यबस्था होस भन्नाका लागि यसरी अभियान संचालन गरिएको गाउँपालिकाका प्रमूख बेदबहादुर थापाले जानकारी दिए । समुदायमा रहेका स्थानीय सामुदायीक बनका समितिहरुसंग सहकार्य गरी गत वर्ष आठ वटा सुक्खा पोखरीहरु निर्माण गरेको थापाले दाबी गरे ।

एउटा पोखरी निर्माण गर्नका लागि करिब चार लाख रुपैयाँ लाग्ने र सो रकम अनुदान स्वरुप सामुदायीक वनको बैंक खातामा सिधै भुक्तानी गर्ने प्रबन्ध मिलाएको गाउँपालिकाले दाबी गरेको छ ।

पछिल्लो समयमा ग्रामीण स्तरमा पानीका मुहानहरु सुक्दै जान थालेको बन जंगलमा रहेका पन्छीहरुका लागि पिउने पानीको पनि ब्यबस्था हुने र जलाधार संरक्षणका लागि पोखरी निर्माण कार्यमा गाउँपालिका लागेको थापाले दाबी गरे । यस्तै बाटो निर्माण गर्दा वन जंगल नमासिने गरी , बन्यजन्तुहरुको बासस्थानमा खलल नपुग्ने गरी पानीका मुहानहरुलाई संरक्षण गर्ने गरी बाटो निर्माण गरिने पनि पालिकाले दाबी गरेको छ ।

तिलाचन पाण्डे
असार ८ ,२०८० गुल्मीः दुई नगरपालिका र १० गाउँपालिका गरी १२ स्थानीय तह रहेको गुल्मीमा यति बेला आर्थिक वर्ष २०८०।०८१ का लागि नीति तथा कार्यक्रम र बजेट बनाउने चटारो रहेको छ ।

सदरमुकाम तम्घासमा रहेको रेसुङगा नगरपालिकाले पर्यटन, शिक्षा,स्वास्थ्य , कृषिलाई प्राथमिकता दिएर असार ५ गते नीति तथा कार्यक्रम ल्याएको छ । सोही नीति तथा कार्यक्रमको आधारमा जनताको मन छुने गरी असार १० गते बजेट ल्याउने तयारीमा रहेको नगरप्रमुख खिलध्वज पन्थीले जानकारी दिए ।

मुसिकोट नगरपालिकाले असार १० गते नै नीति तथा कार्यक्रम र बजेट ल्याउने गरी तयारी गरेको छ । नगरले रोजगारी ,शिक्षा ,स्वास्थ्य र कृषिलाई प्राथामिकता दिने गरी नीति तथा कार्यक्रम र बजेटको तयारी गरेको नगरप्रमुख जीवन खरेलले जानकारी दिए ।

मालिका गाउँपालिकाले कृषि ,पर्यटन , शिक्षा ,रोजगार र पुर्वाधारलाई प्राथामिकता दिएर असार ६ गते नीति तथा कार्यक्रम ल्याएको छ ।

मदाने गाउँपालिकाले असार ९ मा नीति तथा कार्यक्रम ल्याउने र १० गते बजेट प्रस्तुत गर्ने कार्यक्रम तय भएको उपाध्यक्ष सरिता खड्काले जानकारी दिइन । पालिकाले कृषिलाई प्राथमिकता दिएर नीति तथा कार्यक्रम र बजेट ल्याउने गरी तयारी गरेको उनले बताइन् ।

इश्मा गाउँपालिकाले असार ५ गते नीति तथा कार्यक्रम ल्याएको छ । पालिकाले खानेपानी,शिक्षा र पर्यटनलाई जोड दिएको छ ।

धुर्कोट गाउँपालिकाले असार ६ गते प्रस्तुत गरेको नीति तथा कार्यक्रममा कृषि र पर्यटनलाई जोड दिई जसको माध्यमबाट रोजगारी सृजना गर्ने विषयलाई प्राथमिकता दिएको छ ।

४० वर्ष नाघेका महिला र ४५ नाघेका अविवाहित पूरुषलाई निर्वाह भत्ता

गुल्मीदरबार गाउँपालिकाले असार ७ गते प्रस्तुत गरेको नीति तथा कार्यक्रममा पालिका भित्र ४० वर्ष नाघेका अविवाहित महिला, ४५ वर्ष कटेका पूरुषलाई निर्वाह भत्ता दिने गरी नीति तथा कार्यक्रम प्रस्तुत गरेको छ ।

उनीहरुलाई एकल भएको महसुुस नगराउन र स्थानीय सरकार साथमा रहेको अनुभूति दिनका लागि यस्तो नीति लिएको गाउँपालिकाका अध्यक्ष सरोजकुमार थापाले जानकारी दिए । यसका साथै कृषि ,स्वास्थ्य र रोजगारीलाई प्राथमिकता दिएको उनको भनाई छ ।

छत्रकोटका जंगलमा बाँदर भुलाउन फलफूलका बिरुवा रोपण

छत्रकोट गाउँपालिकाले असार ५ गते ल्याएको नीति तथा कार्यक्रममा रोजगारीलाई प्राथमिकता दिएको छ । गाउँमै मझौला आकारका उद्योगहरु खोल्ने र उत्पादनलाई प्राथमिकता दिएको गाउँपालिकाले जनाएको छ । यसका साथै पर्यटनलाई प्राथमिकताका साथ राखेको बताउँदै घुम्न जाउँ छत्रकोट कार्यक्रमलाई अभियानका रुपमै संचालन गर्ने नीति लिएको पालिका अध्यक्ष रामप्रसाद पाण्डेले जानकारी दिए ।

बाँदरले कृषकले लगाएको अन्नबाली नष्ट गरिदिएर हैरान बनाएको भन्दै बाँदरलाई जंगलमै भुलाउन स्कुस जस्ता फलफूलहरु रोप्ने नीति लिएको पाण्डेको भनाई छ ।

रुरुक्षेत्र गाउँपालिकाले असार ८ गते नीति तथा कार्यक्रम ल्याएको छ । गाउँपालिकाले स्थानीय आवश्यकता र स्वास्थ्य ,शिक्षा,कृषि ,पर्यटन र रोजगारीलाई प्राथमिकता दिने गरी नीति तथा कार्यक्रम ल्याएको र सोही अनुसार बजेट ल्याउने गरी तयारी गरेको छ ।

पालिकाले १०८ पोखरी निर्माण र १ हजार ८ पिपलका बिरुवा रोपण गर्ने अध्यक्ष यदु ज्ञवालीले प्रस्तुत गरेको नीति तथा कार्यक्रममा उल्लेख गरिएको छ ।

लिफटिङ खानेपानी योजनाहरुको बिद्युत्त महशुलमा २५ प्रतिशत छुट

चन्द्रकोट गाउँपालिकाले असार ६ गते प्रस्तुत गरेको नीति तथा कार्यक्रममा गाउँपालिका लिफटिङ प्रबिधिबाट संचालन भएका खानेपानी समितिको बिद्युत्त महशुलमा २५ प्रतिशत छुट दिने नीति लिएको छ ।

यस्तै मातृत्व र पितृत्व पहिचान नभएका अभिभावक विहिन बालबालिकालाई आवशीय अध्ययनको ब्यवस्था गर्ने नीतिलाई प्राथमिकताका साथ राख्ने नीति लिइएको पालिका अध्यक्ष युवराज केशीले बताए ।

यस्तै पालिकाले गाउँपालिका बासीहरुको नागरिकको सरकारी सेवा तथा सुरक्षा निकायमा पहुँच अभिवृद्धि गर्नका लागि लोकसेवा तथा शिक्षक सेवा तयारी कक्षा संचालन गर्ने छ । बिद्यालयमा स्वास्थ्यकर्मी भन्ने मूल नाराका साथ प्रत्येक महिनाको एक पटक बिद्यालयका बिद्यार्थी तथा शिक्षक,कर्मचारीहरुको स्वास्थ्य परीक्षण गर्ने नीति लिएको केशीले बताए ।

बिद्यालयमा पढ्दै कमाउँदै कार्यक्रम संचालनमा ल्याई सीपमूलक कृषि उद्यमी र आत्म निर्भर हुने नीति अवलम्बन गर्ने नीति लिइएको छ । बिद्यालय,स्वास्थ्यचौकी तथा वडा र पालिकामा समेत बिद्युतिय हाजिरी मार्फत उपस्थिति नियमन गर्ने कार्यलाई ब्यवस्थित गर्ने नीति लिएको केशीको भनाई छ ।

७० वर्ष कटेका ज्येष्ठ नागरिकहरुको घरदैलोमै प्रत्येक महिना सुगर प्रेसर लगायतका आारभूत स्वास्थ्य परीक्षण कार्यक्रम संचालन गर्ने पालिकाले जनाएको छ ।

सडक तर्फ नयाँ बाटोको ट्रयाक खोल्नु अघि पूर्वाधार बिकास समितिको स्थलगत अनुगमन गरी सिफारिस लिनुपर्ने ब्यवस्था गर्नुपर्ने नीति पालिकाले लिएको छ । यस्तै एक वडा एक पोखरी निर्माण कार्यलाई पनि पालिकाले प्राथमिकताका साथ राखेको छ ।

सत्यवतीले कु काठ बिस्थापित गरी बहुमूल्य बनस्पति रोपण गर्ने

सत्यवती गाउँपालिकाले १० गते नै नीति तथा कार्यक्रम र बजेट ल्याउने भएको छ ।

गाउँपालिकाले पालिका भित्रका जंगलहरुमा रहेका कु काठहरुलाई बिस्थापित गरी बहुमूल्य बनस्पति अगरवुड , श्रीखण्ड जस्ता बिरुवाहरु रोपण गर्ने नीति निर्माण गरेको पालिका अध्यक्ष टीकाराम पाण्डेले जानकारी दिए । यसका साथै कृषि , स्वास्थ्य ,शिक्षा, रोगगारीका संङै खानेपानी र सिंचाई प्राथमिकता दिएको पाण्डेको भनाई छ ।

कालीगण्डकी गाउँपालिकामा कोख देखी शोकसम्मको कार्यक्रम

कालीगण्डकी गाउँपालिकाले प्रस्तुत गरेको नीति तथा कार्यक्रममा कोख देखी सोकसम्मको कार्यक्रमलाई पहिलो प्राथमिकता दिएको पालिका अध्यक्ष बेदबहादुर थापाले बताए ।

उहाँले बच्चाहरु गर्भमा रहँदा देखिबाटै बच्चाको वृद्धि बिकासमा सहयोग पुग्ने गरी उपाध्यक्ष कोशेली कार्यक्रम मार्फत कोखबाटै तेजिला र फूर्तिला बनुन भन्ने उद्येश्यका साथ यस्तो नीति लिएको बताउनुभयो । यस्तै मानवको शोकमा समेत पालिका साथमै रहने नीतिलाई अवलम्बन गर्नका लागि मृतकको अन्त्यष्टिसम्म पनि सहयोग गर्ने नीति लिएको उनको भनाई छ ।

यस्तै कृषि , पर्यटन ,शिक्षा ,स्वास्थ्य र रोजगारीलाई प्राथमिकता दिएको थापाले बताए ।