भदौ २३, २०७६ संखुवासभा
लोक सेवा आयोगका पूर्वअध्यक्ष सन्तबहादुर राईको सोमबार निधन भएको छ। संखुवासभाको खाँदबारी नगरपालिक ४ पाङ्मामा विक्रम संवत १९९३ सालमा जन्मिएका राईको ८४ वर्षको उमेरमा निधन भएको छ। लोक सेवा आयोगका पूर्वअध्यक्ष राईको उपचारको क्रममा निधन भएको परिवार स्रोतले जनाएको छ। दिवङ्गत लोक सेवा आयोगका पूर्वअध्यक्ष राईको श्रीमती र दुई छोरी छन्। उनको आजै पशुपति आर्यघाटमा अन्त्येष्टि गरिने बताइएको छ। राईको श्रद्धाञ्जलिका लागि निर्वाचन आयोगका आयुक्त दिनेश थपलिया र गृह सचिव प्रमकुमार राई र संखुवासभाका संघीय संसदका सदस्य राजेन्द्र गौतम पशुपति आर्यघाट पुगे सकेको परिवार स्रोतले जनाएको छ। लोक सेवा आयोगका पूर्वअध्यक्ष राई २०१७ सालमा सरकारी सेवामा प्रवेश गरेका थिए। २०२६ सालमा पाँचथरको प्रमुख जिल्ला अधिकारी भएका राई २०४१ सालमा नेपाल सरकारको सचिव भएका थिए। संखुवासभामा जन्मिएका राई २०४८ सालमा लोक सेवा अयोगको सदस्य हुँदै २०५१ सालमा अध्यक्ष बनेका थिए।

भदौ २३, २०७६ बैतडी
सरकारद्वारा प्रतिबन्धित नेत्रविक्रम चन्द विप्लव नेकपा समूहको विद्यार्थी संगठनका २ जनालाई बैतडीवाट पक्राउ गरिएको छ। पक्राउ गरिनेमा नेकपा समूहको विद्यार्थी संगठन अखिल क्रान्तिकारीका दार्चुला जिल्ला संयोजक ध्वनि धामी र खगराज नेपाली रहेका छन्। दुबैजनालाई प्रहरीले बैतडीको दोगडाकेदार गाउँपालिका ६ धौलिढुंगास्थित लटिनाथ आधारभुत विद्यालयवाट नियन्त्रणमा लिएको हो। उक्त विद्यालयमा आफ्नो संगठन विस्तार गरिरहेका बेला उनीहरूलाई पक्राउ गरिएको बैतडीका प्रहरी प्रवक्ता किसन चन्दले जानकारी दिए। पक्राउ गरेका दुवैजनामाथि बैतडी जिल्ला अदालतवाट अभद्र व्यवहारको मुद्दा चलाई अनुसन्धानको लागि १० दिनको म्याद थप गरिएको उनले बताए। यसका साथै पक्राउ परेका दुईजनासँगै अन्य सात जनालाई पनि नियन्त्रणमा लिइएको भए पनि उनीहरू बालबालिका रहेकोले आफन्तको जिम्मा लगाएको जिल्ला प्रहरी कार्यालय बैतडीले जनाएको छ। यसैबीच पक्राउ परेका आफ्ना विद्यार्थी नेतालाई झुठो मुद्दामा फसाउन खाजेको भन्दै अखिल क्रान्तिकारी सेती महाकाली क्षेत्रीय समन्वय समितिका संयोजक विरेन्द्र शाहले सोमबार एक विज्ञप्ति जारी गर्दै बिनासर्त ससम्मान रिहाइ नगरे निर्मम संघर्ष गर्ने जनाइएको छ।

भदौ २२, २०७६ काठमाडौ‌ं
सुनको भाउ आइतबार प्रतितोला ५ सय रुपैयाँले घटेको छ। शुक्रबार ७२ हजार रुपैयाँ प्रतितोलामा कारोबार भएको छापावाल सुन आइतबार प्रतितोला ५ सय रुपैयाँले घटेको हो । नेपाल सुनचाँदी व्यवसायी महासंघका अनुसार आइतबार छापावाल सुन प्रतितोला ७१ हजार ५ सय रुपैयाँमा कारोबार भइरहेको छ। यसैगरी, तेजाबी सुनको मूल्यमा ७१ हजार २ सय रुपैयाँ कायम भएको छ। तेजाबी सुन शुक्रबार प्रतितोला ७१ हजार ७ सय रुपैयाँमा कारोबार भएको थियो। केहीदिन अघिसम्म निरन्तर उकालो लागेको सुनको मूल्य पछिल्लो सातामा भने केही कमी आएको छ। छापावाल सुन प्रतितोला ७३ हजार नाघेकोमा अहिले मूल्य केही घटेको हो। चाँदी तोलाको ८ सय ८५ सय रुपैयाँ कायम भएको महासंघले जनाएको छ।

भदौ २२, २०७६ काठमाडौ‌

एक हजार रुपैयाँको लोभ गर्दा वाणिज्य आपूर्ति तथा उपभोक्ता संरक्षण विभाग बबरमहलका नायब सुब्बा अख्तियारको फन्दामा परेका छन्। नायव सुब्बा पुरूषोत्तम पोखरेल १ हजार रुपैयाँ घुस रकमसहित पक्राउ परेका अख्तियार दुरुपयोग अनुसन्धान आयोगले जनाएको छ। पोखरेलले सहजकर्ता केदारप्रसाद न्यौपानेबाट पूजी वृद्धि तथा शाखा विस्तारका लागि एक हजार घुस रिसवत रकम लिँदै गर्दा अख्तियारको टङ्गाल कार्यालयबाट खटिएको टोलीले नियन्त्रणमा लिएको थियो। घुस लिने पोखरेलसँगै घुस दिने न्यौपानेलाई पनि वाणिज्य आपूर्ति तथा उपभोक्ता संरक्षण विभागको कार्यालय परिसरबाटै नियन्त्रणमा लिएर अनुसन्धान भइरहेको अख्तियारका प्रवक्ता प्रदीप कुमार कोईरालाले जानकारी दिए।