माघ १६,२०८० गुल्मी : गुल्मी जिल्ला सदरमुकाम तम्घासमा सञ्चालित सफल र सम्पन्न आयुर्वेद पसल सिल गरेको प्रशासनले छानविन गर्न समिति बनाएको छ । सत्य तथ्य छानविन गर्नका लागि जिल्ला प्रशासन कार्यालय गुल्मीका प्रशासकीय अधिकृत दिनेश ज्ञवालीको नेतृत्वमा पाँच सदस्य रहेको समिति गठन गरेको हो ।

जसको सदस्यहरुमा स्वास्थ्य कार्यालय गुल्मीका जनस्वास्थ्य अधिकृत पशुपति आचार्य, रेसुङ्गा नगरपालिका स्वास्थ्य शाखा प्रमुख मञ्जु घर्ती, आयुर्वेद स्वास्थ्य केन्द्र गुल्मीका डाक्टर सुरज पाण्डे र प्रहरी निरीक्षक सूर्यमान चौधरी सदसय रहेको समिति गठन गरिएको सहायक प्रमुख जिल्ला अधिकारी हरिप्रसाद गैरेले बताउनुभयो । समितिले यहि माघ १९ गतेसम्म सत्य तथ्य बुझेर प्रतिवेदन पेश गर्नेछ ।

प्रतिवेदन आएपछि त्यसलाई आधार मानि दोषी देखिएमा कानून अनुसारको कारवाही प्रशासनले जनाएको छ । तम्घासको पुरानो बजारमा रमेश अधिकारीले सञ्चालन गर्दै आएको सम्पन्न आयुर्वेद पसल र सफल होमियोप्याथिक औषधी पसल अधिकार क्षेत्र भन्दा बाहिर रहेर काम गरेको पाइएको भन्दै प्रशासनले सोमबार सिल भएको हो ।

औषधी खुद्रा बिक्रीको लागि दर्ता भएको उक्त पसले गैरकानुनी ढंगले क्षेत्र अधिकार बाहिर रहेर उपचार र ल्याब सेवा सञ्चालन गरेको पाइएको छ । उक्त पसलले आयुर्वेद र एलोपेथिक औषधीहरु राख्ने गरेको,एक्स–रे तथा भिडियो–रे सेवा, फिजियो थेरापी र नेबुलाइजर सेवा, पनि प्रवाह गरेको पाइएको थियो ।
साथै बिरामी भर्ना गरेर भिन्नि ढंगले उपचार गर्दै आएको पनि पाइएको अनुगमन कर्ताले फेला पारेका थिए । अधिकारीले रेसुङ्गा नगरपालिका वडानम्बर ८ मा पसल र वडानम्बर ९ मा ल्याब र औषधीको ठूलो जोदाम ।राखेर सेवा प्रवाह गर्दै आएको फेला परेको प्रशासनले जनाएको छ ।

आयुर्वेदले गम्भीर प्रकृतिका बिरामी हेर्ने, औषधि वितरण गर्ने र प्रयोगशाला संचालन गरेको गुनासो आएपछि आयुर्वेद बन्द गरेको प्रमुख जिल्ला अधिकारी कृष्णप्रसाद शर्माले बताउनुभयो ।
सोमबार जिल्ला प्रशासन कार्यालय गुल्मीका प्रशासकीय अधिकृत नारायण घर्तीको नेतृत्वमा गएको टोलीले आयुर्वेद सिल गरेको थियो । उक्त आयुर्वेद पसलले आठ कोठामा औषधि, प्रयोगशाला र बिरामी कुरुवा कक्ष सञ्चालन गरेको छ ।

अधिकार क्षेत्र भन्दा बाहिर रहेर काम गर्ने अधिकार कसैलाई नभएको भन्दै अनुसन्धान पश्चात के कारवाही गर्ने भन्ने बारेमा निर्णय लिइने शर्माले बताउनुभयो । जिल्ला सदरमुकामै क्षेत्र अधिकार बाहिर रहेर आयुर्वेद पसल सञ्चालन गरेर स्वास्थ्य जस्तो सम्बेदनशिल बिषयमा खेलबाड हुँदै आएको प्रति नागरिकको गुनासो बढेको थियो ।

उक्त पसलले गम्भीर प्रकृतिका बिरामी भर्ना गर्ने र चेक जाँच गर्ने गरेको आरोप स्थानीयको छ । उक्त पसलमा आयुर्वेद स्वास्थ्य केन्द्र गुल्मीले अनुगमन गर्दा क्षेत्राधिकार भन्दा बाहिर रहेर काम गरेको फेला पारेर पटक पटक सुझाब दिँदा समेत अटेर गर्दै आएको स्वास्थ्य केन्द्रले जनाएको छ ।

तिलाचन पाण्डे
माघ ९,२०८० गुल्मीः गुल्मीको एक पालिकाले छोरी जन्मे छोरीको खातामा १० हजार रुपियाँ जम्मा गरिदिने नीति लिएको छ ।

जिल्लाको कालीगण्डकी गाउँपालिकाले पालिका भित्र छोरी जन्मिएमा छोरीको खाता खोलेर १० हजार रुपियाँ जम्मा गरिदिने नीति लिएको गाउँपालिकाले जनाएको छ ।

अहिले छोरीको खाता खोलेर अक्षयकोषको रुपमा १० हजार राखिदिने र उसको खाता रोक्का गरिदिने गरी योजना बनाएको स्वास्थ्य शाखाका प्रमुख चन्द्रबहादुर थापाले जानकारी दिए । अहिले राखिदिएको १० हजार रुपियाँबाट १५ वर्षपछी छोरीको नागरिकता बन्दा करिब ४० हजार रुपियाँ पुग्ने भएकाले उच्च शिक्षा हासिल गर्नमा थप टेवा पुग्ने गाउँपालिकाले विश्वास लिएको छ । छोरीको नागरिकता बनेपछी छोरीले उक्त रकम निकाल्न पाउँने भएकाले अन्य परिवारका सदस्यले निकाल्न नपाउने गरी कुमारी बैङकमा खाता खोल्ने र उक्त रकम जम्मा गरिदिने गाउँपालिकाले जनाएको छ ।

प्रमुख प्रशासकीय अधिकृत नरेश गिरीले छोरीको खातामा १० हजार जम्मा गरिदिने नीतिलाई ब्यवहारमा लागु गर्न कार्यविधि बनाइ सकेको बताए । कार्यविधि पास भइ सकेकाले छोरीको खातामा रकम जम्मा गरिदिनका लागि कुनै कानूनी समस्या नभएको गिरीको भनाइ छ ।

गाउँपालिकाका अध्यक्ष वेदबहादुर थापाका अनुसार छोरी जन्मे भन्दा अझै पनि समाजमा फरक दृष्टिकोणले हेर्ने प्रचलन कायमै रहेकाले त्यसको अन्त्य गर्नका लागि यस्तो नीति लिइएकोे बताए ।
यसका साथै किशोरी अवस्थामा उच्च शिक्षा हासिल गर्न र अन्य केही योजनाहरु बनाएमा त्यसलाई सहयोग पुग्ने गरी काम गर्ने भएकाले १० हजार खातामा राखिदिने नीति बनाइएको थापाको भनाइ छ ।

गत आर्थिक वर्षमा गाउँपालिका भित्र करिव ४० जना छोरी जन्मिएको स्वास्थ्य शाखाको तथ्याङकमा छ । उनीहरुलाई गाउँपालिकाले पाँच हजारका दरले उपलब्ध गराएको थियो । सिधै पाँच हजार उपलब्ध गराउँदा यसको औचित्य नदेखिएकाले यसलाई अहिले परिमार्जन गरिएको स्वास्थ्य शाखाले जनाएको छ ।

यस आर्थिक वर्षको हालसम्म पालिका भित्र २० जना छोरी जन्मिएको निवेदन प्राप्त भएकाले १० हजार जम्मा गरिदिने कार्य अन्तिम चरणमा पुगेको स्वास्थ्य शाखा प्रमुख थापाले बताए ।

पालिकाले उपाध्यक्ष कोशेली कार्यक्रम अन्र्तगत सुत्केरीलाई भेटन जाँदा भाले कोशेली लिएर भेटन जाने गरेको उपाध्यक्ष मञ्जुकुमारी दर्लामीले बताइन् ।

सूर्य सुनार
माघ ८,२०८० गुल्मी :गुल्मीको एक विद्यालयमा उपभोक्ता हित सम्बन्धी जागरण कार्यक्रम गरिएको छ । जिल्लाको मुसिकोट नगरपालिका ४ बारुकामा रहेको मुसिकोट माध्यामिक विद्यालयमा एक दिने सचेतना कार्यक्रम गरिएको विद्यालयका शिक्षक गणेश पन्थीले जानकारी दिनुभयो ।

लुम्बिनी प्रदेश उद्योग बाणिज्य तथा उपभोक्ता संरक्षण निर्देशनालय सिद्धार्थनगर रुपन्देहीको आयोजनामा ७५ जना विद्यार्थीहरुलाई उपभोक्ता हक अधिकार, उपभोक्ता संरक्षण ऐनमा भएका व्यवस्थाहरु, उत्पादकका दायित्वका विषयमा विद्यार्थीहरुलाई सचेतना गराइएको निर्देशनालयका निर्देशक अर्जुन बहादुर थापाले बताउनुभयो ।

कारोवार स्थलमा साईनवोर्ड, मूल्यसुची ख्याल गर्नुपर्ने, उत्पादन मिति र उपभोग्य मिति हेरेर मात्र समान खरिद गर्नुपर्ने जस्ता विषयमा विद्यार्थीहरुलाई सिकाउदा समाजमा राम्रो प्रभाव पर्ने हुँदा विद्यार्थीहरुलाई सचेतना गराइएको थापाको भनाइ छ ।
उहाँले अनुगमन भन्दा पनि उपभोक्ता सचेतना महत्वपूर्ण भएको भन्दै प्रत्येक नागरिक आफैमा सचेत हुनुपर्नेमा जोड दिनुभयो । लुम्बिनी प्रदेशका १२ जिल्लामा यो कार्यक्रम गरिने निर्देशानालयले जनाएको छ ।

मुसिकोट माध्यामिक विद्यालयका शिक्षक गणेश पन्थीले विद्यालयमा आएर धेरै राम्रो र समाजमा राम्रो प्रभाव पार्ने कार्यक्रम गरिदिएको भन्दै लुम्बिनी प्रदेश उद्योग बाणिज्य तथा उपभोक्ता संरक्षण निर्देशनालयलाई धन्यवाद व्यक्त गर्नुभयो ।