असोज ११,२०८० गुल्मीः गुल्मीमा दुई सय कुकुरमा रेविज विरुद्धको निशुल्क खोप लगाइएको छ ।
एकको लागि सबै र सबैका लागि एक स्वास्थ्य भन्ने नाराका साथ असोज ६ देखी ११ गतेसम्म साताब्यापी रुपमा चलेको अभियानमा ६० र चालु आर्थिक वर्षमा एक सय ४० गरी कूल दुई सय कुकुरमा रेविज विरुद्धको खोप लगाइएको भेटेरिनरी अस्पताल तथा पशु सेवा विज्ञ केन्द्र गुल्मीका सूचना अधिकारी मदन भण्डारीले जानकारी दिए ।
साताब्यापी रुपमा चलेको अभियानमा दूई वटा बिद्यालयमा जनचेतना स्वरुप कक्षा संचालन, पम्प्लेट वितरण र जिल्ला प्रशासनको गेट अगाडी जनचेतनामूलक ब्यानर राखिएको भण्डारीले बताए ।
रेविज रोगबाट बच्न छाडा कुकुरहरुको ब्यबस्थापन संगै बन्ध्याकरण , जनचेतना र खोप नै मुख्य रहेको भण्डारीको दाबी छ ।
गत वर्ष कार्यालयको तर्फबाट चार सय ५७ कुुकुरमा रेविज विरुद्धको खोप लगाइएको थियो । सदरमुकाम तम्घासमा भुस्याहा कुकुरको सङख्यामा वृद्धि भएपछि रेसुङगा नगरपालिकामा ६९ र रुरुक्षेत्र गाउँपालिकामा ५० गरी एक सय १९ कुकुरहरुमा स्थायी बन्ध्याकरण गरिएको कार्यालयले जनाएको छ ।
