असोज १९,२०७९ चितवन : चितवनमा जिपको ठक्करले श्रीमानको मृत्यु भएको छ भने श्रीमती घाइते भएकी छन् ।
भरतपुर महानगरपालिका –२९ सेतीदोभानमा नारायणगढबाट मुग्लिनतर्फ जाँदैगरेको बा १५ च ७४७९ नम्बरको जिपले मुग्लिनबाट नारायणगढतर्फ आउँदैगरेको बागमती प्रदेश ०२–०३६ प ११७४ नम्बरको मोटरसाइकललाई ठक्कर दिँदा मोटरसाइकलमा सवार दुई मध्ये एकको मृत्यु भएको प्रहरीले जनाएको छ ।
पर्वतको महाशिला गाउँपालिका –५ का ४८ वर्षीय मित्रलाल पङ्गेनीको दुर्घटनामा मृत्यु भएको प्रहरीले जनाएको छ ।
टाउकोमा गम्भीर चोट लागेका उनको उपचारका क्रममा भरतपुरको पुरानो मेडिकल कलेजमा मृत्यु भएको जिल्ला प्रहरी कार्यालयले जनाएको छ ।
घाइते राधाको पुरानो मेडिकलमा उपचार भइरहेको छ ।
