कालिकापथ सडक बिस्तार गर्न सूरु

0
64

 

रिया बस्नेत

बुटवल कात्तिक २४ गते । सडक बिस्तारमा देखाएको उदाशिनताको आरोपलार्ई चिर्दै बुटवल उपमहानगरपालिकाले कालिकापथ सडक बिस्तार गर्न सूरु गरेको छ । उत्तर दक्षिण भएर जाने सिद्धार्थ राजमार्ग बिस्तारमा उदाशिनता देखाएको बुटवल उपमहानगरपालिकाले यसरी सडक भित्रि सडक ८२ फुट कायम गर्ला भन्ने धेरैलाई बिश्वास नै थिएन । तर बुटवलले सबैलाई चकित पारेर सडक बिस्तार अभियान नै सूरु गरेको छ जसले साघुरो र अव्यवस्थीत सडकको परिचय बनाएको कालिकापथको मुहारमा चमक देखिने छ । बेलहिया बुटवल व्यापारिक मार्ग विस्तार आयोजना अन्तर्गत बुटवलको राजमार्ग चौराहदेखि गोलपार्क सम्मको सडक अतिक्रमण गरी बनाईएका भौतिक संरचना हटाउन नसक्दा उक्त आयोजना अहिलेपनि अलपत्र छ । तर बुटवलले हिम्मत गरेर आफ्नो भित्री वाईपास सडकलाई ८२ फुट चौडा बनाउने काममा लागेको छ । सडक बिस्तारको अगुवाई नेपाल कम्युनिष्ट पार्टि नेकपाका नगर अध्यक्ष बावुराम पन्थीले गरेका छन भने उनलाई नेपाली कांग्रेस सहित अन्य सर्वसाधारणले समेत साथ दिएका छन । तरपनि सडक किनारका केही घरधनीहरु सडक विस्तारको कामलाई पनि रोक्न भन्दै अदालतसम्मै पुगेका छन् ।सडक बिस्तारको क्रममा बुटवल उपमहानगरपालिका वडा नं ९ का सदस्य रहेका शिव अधिकारी समेतको घर भत्काउनु पर्ने अवस्था रहेको छ पन्थीले भने । पन्थी संगको कुराकानीकै क्रममा आई पुगेका वडा सदस्य अधिकारीले आफु केही दिनलाई बाहिर जान लागेकोले नआउन्जेल नभत्काई दिन आग्रह मात्र गरेनन फर्के पछि घरले मिचेको सडक खाली गरीदिने प्रतिवद्धता ब्यक्त गरे । बुटवल उपमहानगरपालिकाले संघीय र प्रदेश सरकारको सहकार्यमा गत आर्थिक वर्षमा तीन करोड र चालु आर्थिक वर्षमा तीन करोड ५० लाख गरी ६ करोड ५० लाख बजेट विनियोजन गरेर काम सुरु गरेको जनाएको छ । सडक क्षेत्राधिकार कायम गर्दै नाली निर्माण र फुटपाथ बनाउने काम तीव्र भईरहेको छ । पहिलो चरणमा नाली र फुटपाथ निर्माण सक्ने र लगत्तै पिचको काम सुरु हुने बताईएको छ । बुटवलले यो सडकको विस्तृत परियोजना प्रतिवेदन (डीपीआर) नै बनाएर नमुना सडक बनाउन थालेको हो ।

डीपीआरमा झण्डै एक अर्ब लागत र तीन वर्षको अनुमान गरिएपनि लागत र समय दुबै घट्न सक्ने बताइएको छ । गत आर्थिकवर्षको सुरुमै सडकको क्षेत्राधिकार छुट्टाएर काम सुरु गर्ने भनिएपनि केहीसमय रोकिएको थियो । तर, अहिले भने विस्तारको कामलाई तीव्रता दिइएको छ । कृषि उपज केन्द्र परिसरदेखि योगिकुटीसम्मको भित्री सडकलाई ८२ फुटको कायम गर्दै नमुना मार्ग बनाउने उपमहानगरपालिकाको दावी छ । सडक छेवैमा प्रदेश सभा सचिवालय रहेका कारण पनि यो सडक बिस्तार गर्न बुटवल उपमहानगरपालिकालाई दवाव श्रृजना भएको हो । यस अघि ०५४ सालमा यो सडकलाई ८२ फुटको कायम गर्नेगरी तत्कालीन बुटवल नगरपालिकाले तयारी गरेपनी केही घरधनीले सडक विस्तारमा अवरोध सिर्जना गरेकाले काम सूरु हुन सकेन । उपमहानगरका प्रमुख शिवराज सुवेदीले नगरवासीहरुकै सहकार्यमा योजनाहरुको सफल कार्यान्वयन गरिने बताउँदै दीर्घकालीन योजना अनुरुप पूर्वाधार विकासका कामहरु भइरहेको बताए । उपमहानगरपालिकाका वरिष्ठ इन्जिनियर तथा सहरी पूर्वाधार विकास महाशाखा प्रमुख सुमन श्रेष्ठले वाइपास सडकहरुलाई बुटवलको चक्रपथसंग जोड्नेगरी काम भइरहेको छ । बुटवलले चुरे पहाड र तराईलाई जोड्दै झण्डै ४५ किलोमिटरको चक्रपथ निर्माण गरिरहेको उनले बताए ।

SHARE